Цаг уур, орчны шинжилгээний газрын дарга Э.Баттулга Морин-Уулын цаг уурын радарыг шинэчлэх төслийн бэлтгэл судалгааны хүрээнд Монгол Улсад ажиллаж буй Японы олон улсын хамтын ажиллагааны байгууллага (JICA)-ын ноён Кавата Козо тэргүүтэй төлөөлөгчдийг хүлээн авч уулзлаа.

Уулзалтын үеэр Морин-Уулын цаг уурын радарыг шинэчлэх төслийн хэрэгцээ, шаардлага, бэлтгэл судалгааны явц болон цаашдын хамтын ажиллагааны талаар санал солилцов.

Уулзалтын дараа төлөөлөгчид Нислэгийн цаг уурын төв (НЦУТ) болон Морин-Уулын радарын станцад ажиллаж, радарын ажиглалтын үйл ажиллагаа, тоног төхөөрөмжийн өнөөгийн байдал, ашиглалтын нөхцөлтэй газар дээр нь танилцлаа.

Мөн Барилгын хөгжлийн төв болон радарын барилгын хийц, бүтээцийн техникийн төлөв байдалд үнэлгээ хийх компанийн төлөөлөлтэй уулзаж, барилгын бүтээцийн үнэлгээний ажлыг зохион байгуулах, шинэ радарын тоног төхөөрөмж суурилуулахад одоо ашиглаж буй барилга байгууламжийн тохиромжтой байдлыг тогтоохтой холбоотой асуудлаар санал солилцов.

Түүнчлэн JICA-ийн байранд уулзалт хийж, бэлтгэл судалгааны хүрээнд зохион байгуулсан уулзалт, газар дээрх үзлэгийн үр дүн болон цаашид хэрэгжүүлэх арга хэмжээний талаар санал солилцлоо.

Төслийн бэлтгэл судалгаа нь 2026 оны 12 дугаар сард Япон Улсын Засгийн газраас төслийн эхний шатны зөвшөөрөл авахад чиглэж байна.

Морин-Уулын цаг уурын радар нь 1999 онд ашиглалтад орсон бөгөөд нийслэл болон төвийн бүсийн цаг агаарын аюултай үзэгдлийг илрүүлэх, хур тунадасны ажиглалт хийх, урьдчилан мэдээлэх үйл ажиллагаанд чухал үүрэг гүйцэтгэж ирсэн.

Тус радарыг орчин үеийн хос туйлшралт Допплерын радараар шинэчилснээр хур тунадасны ажиглалтын чанар, цаг агаарын аюултай үзэгдлийг илрүүлэх, хянах, урьдчилан мэдээлэх чадавхыг сайжруулах боломж бүрдэх юм.