Хууль эрх зүй
Ахмад настны тухай
МОНГОЛ УЛСЫН ЗАСГИЙН ГАЗРЫН ТОГТООЛ
|
2017 оны 7 дугаар сарын 4-ний өдөр |
Улаанбаатар хот |
Дугаар 197
ЖУРАМ БАТЛАХ, ТОГТООЛЫН ХАВСРАЛТАД НЭМЭЛТ, ӨӨРЧЛӨЛТ ОРУУЛАХ ТУХАЙ
Ахмад настны тухай хуулийн 8.2, 9.7, 13.2, 14.7, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 6.3, Хөгжлийн бэрхшээлтэй хүний эрхийн тухай хуулийн 26.4, 32.8, 37.2.1-д заасныг тус тус үндэслэн Монгол Улсын Засгийн газраас ТОГТООХ нь:
1. “Ахмад настанд үйлчилгээ үзүүлэх, дэмжлэг, хөнгөлөлт олгох журам”-ыг 1 дүгээр, “Ахмадын сан байгуулан ажиллуулах журам”-ыг 2 дугаар, “Ахмад настан, хөгжлийн бэрхшээлтэй хүн нийтийн тээврийн хэрэгслээр үнэ төлбөргүй зорчих журам”-ыг 3 дугаар, “Ахмад настны хөдөлмөр эрхлэлтийн бүртгэл, мэдээллийн санг удирдах, ашиглах журам”-ыг 4 дүгээр, “Хөгжлийн бэрхшээлтэй хүнд тусламж, хөнгөлөлт үзүүлэх журам”-ыг 5 дугаар хавсралт ёсоор тус тус баталсугай.
2. “Журам батлах тухай” Засгийн газрын 2012 оны 5 дугаар сарын 30-ны өдрийн 185 дугаар тогтоолын 1 дүгээр хавсралтаар баталсан “Нийгмийн халамжийн тэтгэвэр, тэтгэмж олгох журам”-ын 2.13 дахь заалтын “... эрүүл мэндийн үндэсний төв” гэсний дараа “... , байнгын асаргаа шаардлагатай 0-16 насны хөгжлийн бэрхшээлтэй хүүхдийн тодорхойлолтыг хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын аймаг, дүүргийн орон тооны бус салбар комисс....” гэж нэмсүгэй.
3. Энэ тогтоолын 1 дүгээр зүйлд заасан “Ахмад настанд үйлчилгээ үзүүлэх, дэмжлэг, хөнгөлөлт олгох журам”-ын 2.2, 3.5, 5.1 дэх заалт, “Хөгжлийн бэрхшээлтэй хүнд тусламж, хөнгөлөлт үзүүлэх журам”-ын 2.16 дахь заалтыг 2018 оны 1 дүгээр сарын 1-ний өдрөөс эхлэн мөрдсүгэй.
4. Хөгжлийн бэрхшээлтэй хүний эрхийн тухай хуулийн 26.1.1-26.1.6-д зааснаас бусад нийгмийн халамжийн сангаас хөгжлийн бэрхшээлтэй хүнд үзүүлэх тусламж, хөнгөлөлт олгох ажлыг зохион байгуулах арга хэмжээ авч ажиллахыг Хөдөлмөр, нийгмийн хамгааллын сайд Н.Номтойбаярт даалгасугай.
5. Энэ тогтоол гарсантай холбогдуулан “Журам батлах тухай” Засгийн газрын 2012 оны 5 дугаар сарын 30-ны өдрийн 185 дугаар тогтоолын 2,3,5 дугаар хавсралтыг тус тус хүчингүй болсонд тооцсугай.
Монгол Улсын Ерөнхий сайд Ж.ЭРДЭНЭБАТ
Хөдөлмөр, нийгмийн хамгааллын сайд Н.НОМТОЙБАЯР
Засгийн газрын 2017 оны 197 дугаар
тогтоолын 1 дүгээр хавсралт
АХМАД НАСТАНД ҮЙЛЧИЛГЭЭ ҮЗҮҮЛЭХ, ДЭМЖЛЭГ,
ХӨНГӨЛӨЛТ ОЛГОХ ЖУРАМ
Нэг. Нийтлэг үндэслэл
1.1. Ахмад настны тухай хуулийн 7.1, 8.1.1-8.1.4, 10.1.2, 10.1.3, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 5.4.1-5.4.3-т заасан үйлчилгээ үзүүлэх болон дэмжлэг, хөнгөлөлт олгохтой холбогдсон харилцааг энэхүү журмаар зохицуулна.
1.2. Энэхүү журмын үйлчлэлд Ахмад настны тухай хуулийн 3.1, 3.3, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 4.1-д заасан иргэн хамрагдана.
1.3. Алдар цолтон ахмад настан зөвхөн нэг төрлийн алдар цолны дагуу хөнгөлөлтөд хамрагдана.
1.4. Энэхүү журмын 1.3 дахь заалт ахмад дайчинд хамаарахгүй.
1.5. Нийгмийн халамжийн сангаас ахмад настанд үзүүлэх дэмжлэг, хөнгөлөлт, тусламжийг санхүү, төсвийн асуудал эрхэлсэн төрийн захиргааны төв байгууллага, нийгмийн халамжийн асуудал эрхэлсэн төрийн захиргааны байгууллага болон арилжааны банк хооронд байгуулсан гурвалсан гэрээний дагуу тус банк (цаашид “гэрээт” гэх)-аар дамжуулан олгоно.
Хоёр. Ахмад настанд протез, ортопедийн болон тусгай
хэрэгслийн үнийн дэмжлэг үзүүлэх
2.1. Ахмад настны тухай хуулийн 8.1.1-д заасан протез, ортопедийн болон тусгай хэрэгслийн үнийг нөхөн олгоход Засгийн газраас тогтоосон хэмжээг баримтална.
2.2. Ахмад настан шүдний протез, ортопедийн болон тусгай хэрэгслийг өөрийн сонгосон байгууллагаар хийлгэж болох бөгөөд энэ тохиолдолд энэхүү журмын 2.1-д заасны дагуу үнийг нөхөн олгоно. /Энэ заалтыг 2018-1-1-ний өдрөөс эхлэн дагаж мөрдөнө/
2.3. Ахмад настан эрүүл мэндийн даатгалын асуудал хариуцсан төрийн захиргааны байгууллагатай гэрээ байгуулсан байгууллагаар протез хийлгэсэн тохиолдолд эрүүл мэндийн даатгалын сангаас үнийг нөхөн олгоно.
2.4. Гадаад улсад хийлгэсэн болон энэхүү журмын 2.3-т зааснаас бусад байгууллагаар хийлгэсэн протез, ортопедийн хэрэгслийн үнийг нийгмийн халамжийн сангаас нөхөн олгоно.
2.5. Нийгмийн халамжийн асуудал хариуцсан төрийн захиргааны байгууллага чанарын шаардлага хангасан протез хийх, ортопедийн болон тусгай хэрэгслээр хангах үйлчилгээ үзүүлэх байгууллагын жагсаалт, дэлгэрэнгүй мэдээлэл (хаяг, байршил, утасны дугаар)-ийг гаргаж аймаг, нийслэл, дүүргийн нийгмийн халамжийн үйлчилгээний байгууллагад, аймаг, нийслэл, дүүргийн нийгмийн халамжийн үйлчилгээний байгууллага нь сум, хорооны нийгмийн ажилтанд хүргүүлнэ.
2.6. Аймаг, нийслэл, дүүргийн нийгмийн халамжийн үйлчилгээний байгууллага, сум, хорооны нийгмийн ажилтан энэхүү журмын 2.5-д заасан байгууллагын талаарх мэдээллийг ахмад настан, түүний гэр бүлийн гишүүд, асран хамгаалагчид амаар, бичгээр, цахим хэлбэрээр хүргэнэ.
2.7. Протез хийх, ортопедийн болон тусгай хэрэгслээр хангах үйлчилгээ үзүүлэх байгууллага үйл ажиллагааныхаа талаарх мэдээлэл, бүтээгдэхүүнийг ашиглах заавар, зөвлөлгөөг иргэдэд үнэ төлбөргүй өгөх үүрэгтэй.
2.8. Ахмад настан протез, ортопедийн хэрэгслийг хос эрхтэнд хийлгэсэн тохиолдолд аймаг, дүүргийн эмнэлгийн байгууллагын Эмнэлэг хяналтын комиссын шийдвэрийг үндэслэн эрхтэн тус бүрийн протез, ортопедийн хэрэгслийн үнийг түүнд нөхөн олгоно.
2.9. Ахмад настан протез, ортопедийн болон тусгай хэрэгслийн үнийг нөхөн авахдаа энэхүү журмын 6.1-д заасан баримт бичгийг бүрдүүлэн сум, хорооны нийгмийн ажилтанд хүсэлт гаргана.
2.10. Дүүргийн нийгмийн халамжийн үйлчилгээний байгууллага, сумын нийгмийн ажилтан энэхүү журмын 2.9-д заасан хүсэлтийг хүлээн авснаас хойш 30 хоногийн дотор шийдвэрлэж протез, ортопедийн болон тусгай хэрэгслийн үнийг гэрээт банкаар дамжуулан олгоно.
Гурав. Ахмад настанд амралт, сувилалд амрах
эрхийн бичгийн хөнгөлөлт олгох
3.1. Ахмад настан нь жилд нэг удаа ахмадын зориулалттай амралт, сувилалд Засгийн газраас тогтоосон хөнгөлөлттэй үнээр амарч сувилуулна.
3.2. Нийгмийн халамжийн асуудал хариуцсан төрийн захиргааны байгууллага Ахмад настны тухай хуулийн 8.2-т заасан стандартын шаардлага хангасан амралт сувиллын газраас Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу ахмадын зориулалттай амралт, сувиллын газрыг сонгон шалгаруулна.
3.3. Сонгон шалгаруулалтад тэнцсэн амралт, сувиллын газартай нийгмийн халамжийн асуудал хариуцсан төрийн захиргааны байгууллага гэрээ байгуулна. Гэрээ байгуулсан амралт, сувиллын газарт ахмад настан хөнгөлөлттэй үнээр амрах эрхийн бичгийг нийгмийн халамжийн асуудал хариуцсан төрийн захиргааны байгууллага аймаг, дүүргийн нийгмийн халамжийн үйлчилгээний байгууллагад хүргүүлнэ.
3.4. Ахмад настан өөрийн сонгосон амралт сувилалд амрах хүсэлтээ энэхүү журмын 6.2-т заасан баримт бичгийн хамт сум, хорооны нийгмийн ажилтанд гаргана.
3.5. Ахмад настан амралт, сувиллын газрын эрхийн бичгийн үнийн өөрийн хариуцах хэсгийг бэлэн мөнгөөр төлөх, эсхүл тухайн байгууллагын дансанд шилжүүлж, сум, хорооны нийгмийн ажилтнаас эрхийн бичгийг авна. /Энэ заалтыг 2018-1-1-ний өдрөөс эхлэн дагаж мөрдөнө/
3.6. Гэрээт амралт, сувиллын газар нь амарч, сувилуулсан ахмад настны нэрийн жагсаалт, амарсан хугацааны талаарх мэдээллийг нэхэмжлэлийн хамт сар бүрийн эцэст аймаг, дүүргийн нийгмийн халамжийн үйлчилгээний байгууллагад хүргүүлнэ.
3.7. Аймаг, дүүргийн нийгмийн халамжийн үйлчилгээний байгууллага амралт, сувиллын газраас ирүүлсэн жагсаалтыг ахмад настны бүрдүүлж өгсөн баримт бичигтэй тулган нягталж тухайн байгууллагын дансанд нийгмийн халамжийн сангаас олгох эрхийн бичгийн үнийн хөнгөлөлтийг шилжүүлнэ.
3.8. Гэрээт амралт, сувиллын газар ахмад настанд үзүүлсэн үйлчилгээ, эмчилгээ, сувилгааны чанар, сэтгэл ханамжийн үнэлгээг ахмад настан тус бүрээр хийлгүүлж жилийн эцсийн тайланд хавсаргасан байна.
3.9. Ахмад настны тухай хуулийн 10.1.2, 10.1.3, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 5.4.1, 5.4.2-т заасан хөнгөлөлт авах эрх бүхий ахмад настанд эрхийн бичгийн үнийг энгийн өрөөний тарифаар, тээврийн хэрэгслийн зардлыг авто замын болон агаарын тээврийн тарифт үнээр тооцож олгоно.
3.10. Ахмад настны тухай хуулийн 10.1.3-т заасан дэмжлэгийн хэмжээг Монгол Улсын авто замын сүлжээний атласт заасан замын уртаар нийслэлээс аймаг, аймгаас тухайн иргэний оршин суугаа сумын төв хүртэлх зайг хамааруулан тооцож олгоно.
3.11. Нийгмийн халамжийн асуудал хариуцсан төрийн захиргааны байгууллага ахмадын зориулалттай амралт сувилал, магадлан итгэмжлэгдсэн дотоодын рашаан сувиллын талаарх мэдээллийг аймаг, нийслэл, дүүргийн нийгмийн халамжийн үйлчилгээний байгууллагаар дамжуулан нийтэд мэдээлнэ.
Дөрөв. Бусад дэмжлэг, тусламж үзүүлэх
4.1. Ахмад настны тухай хуулийн 8.1.3, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 5.4.3-т заасан орон сууцны хөлс төлөхөд болон түлш худалдан авах хөнгөлөлтөд хамрагдах ахмад настан энэхүү журмын 6.3-т заасан баримт бичгийг бүрдүүлэн сум, хорооны нийгмийн ажилтанд хүсэлт гаргана.
4.2. Тэжээн тэтгэх хүүхэдгүй эсхүл хууль ёсны тэжээн тэтгэгч нь дэмжлэг, туслалцаа үзүүлэх боломжгүй нь тогтоогдсон ахмад настан энэхүү журмын 4.1-д заасан хөнгөлөлтөд хамрагдах хүсэлт гаргасан тохиолдолд сум, хорооны нийгмийн ажилтан амьдралын нөхцөл байдлыг нь судалж саналаа ажлын 10 хоногт багтаан сум, хорооны Амьжиргааг дэмжих зөвлөлөөр хэлэлцүүлэн шийдвэрлүүлнэ. Амьжиргааг дэмжих зөвлөлийн шийдвэрийг сум, хорооны нийгмийн ажилтан ажлын 5 хоногт багтаан холбогдох баримт бичгийн хамт аймаг, дүүргийн нийгмийн халамжийн байгууллагад хүргүүлнэ.
4.3. Аймаг, дүүргийн нийгмийн халамжийн үйлчилгээний байгууллага дэмжлэг, тусламжид хамрагдах хүсэлт гаргасан ахмад настны баримт бичгийг ажлын 5 хоногт багтаан хянаж тусламжид хамрагдах ахмад настанд хувийн хэрэг нээж аймгийн нийгмийн халамжийн үйлчилгээний байгууллага уг хувийн хэргийг сумын нийгмийн ажилтанд хүргүүлнэ. Дүүргийн нийгмийн халамжийн үйлчилгээний байгууллага, сумын нийгмийн ажилтан нь тусламжид хамрагдах ахмад настны нэрийн жагсаалтыг гэрээт банкинд хүргүүлнэ.
4.4. Монгол Улсын баатар, хөдөлмөрийн баатар, ардын цолтон, ахмад дайчинд орон сууцны хөлс төлөх, эсхүл түлш худалдан авахад нь тусламж үзүүлэхдээ Засгийн газраас тогтоосон хэмжээг хоёр дахин нэмэгдүүлэн олгоно.
4.5. Аймаг, нийслэл, сумын Засаг дарга энэхүү журамд заасан дэмжлэг, тусламжийн зардлыг аймаг, дүүргийн нийгмийн халамжийн үйлчилгээний байгууллагын Төрийн сан дахь дансанд сар бүр тогтоосон хугацаанд санхүүжүүлэх үүрэгтэй.
4.6. Ахмад настан дэмжлэг, тусламжийн мөнгийг өөрийн биеэр авч чадахгүй тохиолдолд итгэмжлэгдсэн төлөөлөгчөөр дамжуулан авч болно. Энэ тохиолдолд итгэмжлэлийг Нотариатын тухай хуулийн 41 дүгээр зүйлд заасны дагуу нотариатчаар гэрчлүүлнэ.
4.7. Ахмад настан дэмжлэг, тусламжийн мөнгийг өөрийн дансанд шилжүүлэх хүсэлтэй бол үйлчилгээ үзүүлж байгаа банкинд хандана.
4.8. Дэмжлэг, тусламжийн мөнгийг тухайн онд авч чадаагүй тохиолдолд дараагийн санхүүгийн жилд нөхөн олгоно. Ахмад настан хүндэтгэн үзэх шалтгаангүйгээр 1 жилээс дээш хугацаагаар дэмжлэг, тусламжийн мөнгийг аваагүй тохиолдолд нөхөн олгохгүй.
4.9. Сумын нийгмийн ажилтан, дүүргийн нийгмийн халамжийн үйлчилгээний байгууллага оршин суугаа засаг захиргааны нэгжээсээ бүрмөсөн шилжиж байгаа ахмад настны хувийн хэргийг хуулбарлан авч үлдэх бөгөөд эх хувийг тухайн ахмад настанд өөрт нь өгнө. Ахмад настан нь шилжин очсон засаг захиргааны нэгжийн нийгмийн ажилтан, нийгмийн халамжийн үйлчилгээний байгууллагад хувийн хэргээ хүлээлгэн өгч дэмжлэг, тусламжид үргэлжлүүлэн хамрагдана.
4.10. Ахмад настан оршин сууж байсан засаг захиргааны нэгжээсээ бүрмөсөн шилжсэнээс хойш 180 хоногийн дотор шилжин суурьшсан нутаг дэвсгэрийн засаг захиргааны нэгжид бүртгүүлээгүй бол бүртгэлгүй байсан хугацааны дэмжлэг, тусламжийг нөхөж олгохгүй.
4.11. Дэмжлэг, тусламжид хамрагдаж байгаа ахмад настан нас барсан тохиолдолд түүний гэр бүлийн гишүүн нь энэ тухай сум, хорооны нийгмийн ажилтанд мэдэгдэж ахмад настны хувийн хэрэгт тэмдэглэл хийлгүүлнэ.
Тав. Ахмад настанд үзүүлэх үйлчилгээ
5.1. Ахмад настны тухай хуулийн 7.1.2-7.1.5-д заасан үйлчилгээг мөн хуулийн 7.3-т заасан иргэн, аж ахуйн нэгж, төрийн бус байгууллага үзүүлнэ. /Энэ заалтыг 2018-1-1-ний өдрөөс эхлэн дагаж мөрдөнө/
5.2. Нийгмийн халамжийн асуудал хариуцсан төрийн захиргааны байгууллага энэхүү журмын 5.1-д заасан иргэн, аж ахуйн нэгж, төрийн бус байгууллагыг магадлан итгэмжилнэ. Магадлан итгэмжлэгдсэн байгууллагын нэрийн жагсаалтыг аймаг, нийслэл, дүүргийн нийгмийн халамжийн үйлчилгээний байгууллагад хүргүүлнэ. Аймаг, нийслэл, дүүргийн нийгмийн халамжийн үйлчилгээний байгууллага нь тэдгээрээс сонгон шалгаруулж ахмад настанд үйлчилгээ үзүүлэх гэрээ байгуулна.
5.3. Аймаг, нийслэл, дүүргийн нийгмийн халамжийн үйлчилгээний байгууллага гэрээ байгуулсан иргэн, аж ахуйн нэгж, төрийн бус байгууллагын мэдээллийг нэгтгэн нийгмийн халамжийн асуудал хариуцсан төрийн захиргааны байгууллага болон сум, хорооны нийгмийн ажилтанд хүргүүлнэ.
5.4. Сум, хорооны нийгмийн ажилтан, аймаг, дүүргийн нийгмийн халамжийн үйлчилгээний болон ахмадын байгууллага нь Ахмад настны тухай хуулийн 7.1-д заасан үйлчилгээ үзүүлэх иргэн, аж ахуйн нэгж, төрийн бус байгууллагын жагсаалт, дэлгэрэнгүй мэдээлэл (хаяг, байршил, утасны дугаар)-ийг нийтэд хүргэх, тухайн ахмад настанд шаардлагатай үйлчилгээг тодорхойлох, сонголт хийхэд туслах, зөвлөгөө өгөх үүрэг хүлээнэ.
5.5. Ахмад настны тухай хуулийн 7.1-д заасан үйлчилгээнд хамрагдахыг хүссэн ахмад настан энэхүү журмын 6.7-д заасан баримт бичгийг бүрдүүлэн сум, хорооны нийгмийн ажилтанд хүсэлт гаргана.
5.6. Сум, хорооны нийгмийн ажилтан ахмад настны хүсэлтийг хүлээн авч тухайн орон нутгийн ахмадын хороо, зөвлөлийн саналыг харгалзан үзэж ажлын 5 хоногт багтаан үйлчилгээнд хамруулах эсэх талаар шийдвэр гаргана.
5.7. Сум, хорооны нийгмийн ажилтан үйлчилгээнд хамрагдах эрх үүссэн ахмад настанд уг үйлчилгээг үзүүлэх байгууллагын талаар танилцуулж, үйлчилгээнд хамруулах арга хэмжээ авна.
5.8. Ахмад настанд үйлчилгээ үзүүлэх байгууллага нь Нийгмийн халамжийн тухай хуулийн 18.7, 18.8-д заасан шалгуур, аргачлалыг баримтлан үйлчилгээ үзүүлнэ.
5.9. Ахмад настны тухай хуулийн 7.1.7-д заасан үйлчилгээг Нийгмийн халамжийн тухай хуулийн 19.7-д, Ахмад настны тухай хуулийн 7.1.8-д заасан үйлчилгээг ахмад настанд Нийгмийн халамжийн тухай хуулийн 22.3-т заасан журмын дагуу үзүүлнэ.
5.10. Ахмад настны тухай хуулийн 7.1.9-д заасан үйлчилгээг ахмад настанд Нийгмийн халамжийн тухай хуулийн 18.1.4-т заасны дагуу үзүүлнэ.
5.11. Ахмад настны тухай хуулийн 7.2.6, 10.1.1, 10.1.4-т заасан үйлчилгээ, дэмжлэгийг эрүүл мэндийн асуудал эрхэлсэн Засгийн газрын гишүүний баталсан журмын дагуу үзүүлнэ.
5.12. Ахмад настанд үзүүлж байгаа үйлчилгээнд сум, хорооны нийгмийн ажилтан, аймаг, нийслэл, дүүргийн нийгмийн халамжийн үйлчилгээний байгууллага хяналт тавина.
Зургаа. Дэмжлэг, хөнгөлөлт, үйлчилгээнд хамрагдахад
бүрдүүлэх баримт бичиг
6.1. Ахмад настны тухай хуулийн 8.1.1-д заасан дэмжлэг авах хүсэлт гаргахад дараах баримт бичгийг бүрдүүлнэ:
6.1.1. өргөдөл (маягтын дагуу);
6.1.2. иргэний үнэмлэх, хуулбарын хамт;
6.1.3. протез хийлгэх шаардлагатай тухай аймаг, дүүргийн эмнэлгийн байгууллагын Эмнэлэг хяналтын комиссын шийдвэр, ортопедийн болон тусгай хэрэгсэл шаардлагатай болохыг тодорхойлсон аймаг, нийслэлд эрүүл мэндийн төв, нэгдсэн эмнэлгийн нарийн мэргэжлийн эмчийн бичиг, сум, тосгонд эрүүл мэндийн төвийн ерөнхий эмчийн тодорхойлолт;
6.1.4. протез, ортопедийн болон тусгай хэрэгслийн үнийг төлсөн баримт эсхүл нэхэмжлэл.
6.2. Ахмад настны тухай хуулийн 8.1.2-т заасан хөнгөлөлтөд хамрагдах ахмад настан энэхүү журмын 6.1.1, 6.1.2-т заасан баримт бичгээс гадна эрхийн бичгийн өөрийн хариуцах үнийг төлсөн баримтыг хавсаргана.
6.3. Ахмад настны тухай хуулийн 8.1.3, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 5.4.3-т заасан тусламж авах хүсэлт гаргахад энэхүү журмын 6.1.1, 6.1.2-т зааснаас гадна дараах баримт бичгийг бүрдүүлнэ:
6.3.1. ахмад настны хувьд тэжээн тэтгэх хүүхэдгүй хүн эсхүл хууль ёсны тэжээн тэтгэгч нь дэмжлэг, туслалцаа үзүүлэх боломжгүйг нотолсон Амьжиргааг дэмжих зөвлөлийн шийдвэр;
6.3.2. нийслэлд амьдарч байгаа хүндэт донор ахмад настны хувьд Цус сэлбэлт судлалын үндэсний төвийн тодорхойлолт, аймаг, суманд амьдарч байгаа хүндэт донор ахмад настны хувьд аймгийн Цусны салбар төвийн тодорхойлолт;
6.3.3. Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 7.1.3-т заасан баримт бичиг.
6.4. Ахмад настны тухай хуулийн 10.1.2, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 5.4.2-т заасан дэмжлэг, хөнгөлөлтөд хамрагдах хүсэлт гаргахад энэ журмын 6.1.1, 6.1.2-т зааснаас гадна дараах баримт бичгийг бүрдүүлнэ:
6.4.1. замын зардал төлсөн баримт;
6.4.2. эрхийн бичгийн хуулбар, мөнгө төлсөн баримт;
6.4.3. хүндэт донор, алдар цолтон ахмад настнаас бусад ахмад настанд эмчилгээ сувилгаа шаардлагатай тухай эмнэлгийн байгууллагын дүгнэлт;
6.4.4. нийслэлд амьдарч байгаа хүндэт донор ахмад настны хувьд Цус сэлбэлт судлалын үндэсний төвийн тодорхойлолт, аймаг, суманд амьдарч байгаа хүндэт донор ахмад настны хувьд аймгийн Цусны салбар төвийн тодорхойлолт;
6.4.5. алдар цолтон ахмад настны хувьд Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 7.1.3-т заасан баримт бичиг.
6.5. Ахмад настны тухай хуулийн 8.1.4-т заасан тусламжийг авахад дараах баримт бичгийг бүрдүүлнэ:
6.5.1. өргөдөл (маягтын дагуу);
6.5.2. нас барсны гэрчилгээ;
6.5.3. оршуулгын тэтгэмж олгоогүй тухай аймаг, дүүргийн нийгмийн даатгалын (суманд нийгмийн даатгалын байцаагч) байгууллагын тодорхойлолт;
6.5.4. ганц бие ахмад настан нас барсан тохиолдолд оршуулах ажлыг хариуцах итгэмжлэгдсэн төлөөлөгчийг томилсон тухай сум, хорооны Засаг даргын шийдвэр;
6.5.5. итгэмжлэгдсэн төлөөлөгчийн иргэний үнэмлэх, хуулбарын хамт.
6.6. Ахмад настны тухай хуулийн 10.1.3, Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 5.4.1-д заасан дэмжлэг, хөнгөлөлт авах хүсэлт гаргахад энэхүү журмын 6.1.1, 6.1.2-т зааснаас гадна дараах баримт бичгийг бүрдүүлнэ:
6.6.1. аймгийн эмнэлгийн байгууллагын Эмнэлэг хяналтын комиссын шийдвэр буюу эрүүл мэндийн асуудал эрхэлсэн Засгийн газрын гишүүний 2013 оны 450 дугаар тушаалаар баталсан 13А болон 13Б маягт;
6.6.2. замын зардал төлсөн баримт;
6.6.3. алдар цолтон ахмад настны хувьд Алдар цолтон ахмад настанд төрөөс нэмэгдэл, хөнгөлөлт олгох тухай хуулийн 7.1.3-т заасан баримт бичиг.6.7. Ахмад настны тухай хуулийн 7.1.1-7.1.5-д заасан үйлчилгээнд хамрагдах ахмад настан энэхүү журмын 6.1.1, 6.1.2-т заасан баримт бичгийг бүрдүүлнэ.
Долоо. Бусад
7.1. Дэмжлэг, тусламж, хөнгөлөлт олгох үйл ажиллагаа, ахмад настанд үзүүлэх үйлчилгээний чанарт сум, хорооны нийгмийн ажилтан, аймаг, дүүргийн нийгмийн халамжийн үйлчилгээний байгууллага, нийгмийн халамжийн асуудал хариуцсан төрийн захиргааны болон төрийн захиргааны төв байгууллага, ахмадын байгууллага тус тус хяналт тавина.
7.2. Энэхүү журмын 6.1.3, 6.3.2, 6.4.3-т заасан эмч, эмнэлгийн болон бусад байгууллагын тодорхойлолт, баримт бичгийг албан тушаалтан хуурамчаар үйлдсэн бол учирсан хохирлыг буруутай этгээдээр нөхөн төлүүлж, хууль тогтоомжийн дагуу хариуцлага хүлээлгэнэ.
7.3. Энэхүү журамд заасан баримт бичгийг хуурамчаар үйлдсэн иргэн, дэмжлэг, тусламж, хөнгөлөлт, үйлчилгээнд хамрагдах ахмад настныг буруу тогтоосон, тодорхойлолтыг үндэслэлгүйгээр буюу хуурамчаар үйлдсэн албан тушаалтан, нийгмийн ажилтанд Нийгмийн халамжийн тухай хуулийн 31 дүгээр зүйл, Зөрчлийн тухай хуульд заасны дагуу хариуцлага хүлээлгэж олгогдсон тусламж, хөнгөлөлтийн зардлыг хууль тогтоомжид заасны дагуу нөхөн төлүүлнэ.
7.4. Сум, хорооны нийгмийн ажилтан, аймаг, дүүргийн нийгмийн халамжийн үйлчилгээний байгууллага болон нийгмийн халамжийн асуудал хариуцсан төрийн захиргааны байгууллага дэмжлэг, тусламж, хөнгөлөлт, үйлчилгээнд хамрагдсан ахмад настны талаарх мэдээллийг нийгмийн халамжийн мэдээллийн нэгдсэн санд бүртгэж, холбогдох мэдээ, тайлан, судалгааг сар, улирал, хагас, бүтэн жилээр гаргана.
-----oOo-----
Засгийн газрын 2017 оны 197 дугаар
тогтоолын 2 дугаар хавсралт
АХМАДЫН САН БАЙГУУЛАН АЖИЛЛУУЛАХ ЖУРАМ
Нэг. Нийтлэг үндэслэл
1.1. Ахмад настны тухай хуулийн 14.7-д заасан Ахмадын сан (цаашид “сан” гэнэ)-г байгуулан ажиллуулах, сангийн хөрөнгийг бүрдүүлэх, зарцуулах, гүйцэтгэлийг тайлагнах, хяналт тавихтай холбоотой үйл ажиллагааг энэхүү журмаар зохицуулна.
1.2. Аж ахуйн нэгж, байгууллага нь тухайн байгууллагын дэргэдэх ахмадын хороо, зөвлөлийн саналыг үндэслэн өөрийн төсөв, жил бүрийн үйл ажиллагааны орлогоосоо цалингийн нийт сангийн гурав хүртэлх хувьтай тэнцэх хэмжээний мөнгөн хөрөнгөөр сан байгуулна.
1.3. Төсөвт байгууллагын тухайд цалингийн сангийн гурав хүртэлх хувьтай тэнцэх хэмжээний мөнгөн хөрөнгөөр сан байгуулж, шаардагдах хөрөнгийг төсөвтөө жил бүр тусгана.
1.4. Сангийн хөрөнгийг бүрдүүлэх, зарцуулах, гүйцэтгэлийг тайлагнах үүргийг тухайн аж ахуйн нэгж, байгууллагын удирдлага хариуцан гүйцэтгэнэ.
Хоёр. Сангийн хөрөнгийн бүрдүүлэлт
2.1. Сангийн хөрөнгийг дараах эх үүсвэрээс бүрдүүлнэ:
2.1.1. аж ахуйн нэгж, байгууллага, төсөвт байгууллагын тухайн жилийн үйл ажиллагааны орлого болон батлагдсан төсвөөс цалингийн нийт сангийн гурав хүртэлх хувьтай тэнцэх хэмжээгээр санд төвлөрүүлсэн хөрөнгө;
2.1.2. сангийн үйл ажиллагаанаас олох орлого;
2.1.3. сангийн тухайн жилийн зарцуулагдаагүй чөлөөт үлдэгдэл хөрөнгө;
2.1.4. гадаад, дотоодын байгууллага болон иргэдээс санд өгсөн мөнгөн болон мөнгөн бус хандив, тусламж;
2.1.5. сангийн хөрөнгийн үлдэгдлийг банкинд хадгалуулсны хүүгийн орлого;
2.1.6. бусад эх үүсвэр.
Гурав. Сангийн хөрөнгийн зарцуулалт
3.1. Сангийн хөрөнгийг Ахмад настны тухай хуулийн 12.1, 14.6-д заасан дараах арга хэмжээнд зарцуулна:
3.1.1. байгууллага, салбартаа онцгой үр бүтээл гарган олон жил идэвх зүтгэлтэй ажилласан ахмад настанд нэмэгдэл тэтгэвэр, тэтгэмж олгох;
3.1.2. Цагаан сар, ахмадын өдрийг тохиолдуулан хүндэтгэл үзүүлэн бэлэг дурсгалын зүйл гардуулах;
3.1.3. нийтийн халаалтгүй сууц, гэрт амьдардаг ахмад настанд түлш худалдан авахад нь зориулан жил бүр Засгийн газраас тогтоосон хэмжээгээр мөнгөн дэмжлэг үзүүлэх;
3.1.4. хувиараа хөдөлмөр эрхлэх болон үйлдвэрлэл, үйлчилгээ эрхэлж байгаа ахмад настанд санхүүгийн дэмжлэг үзүүлэх;
3.1.5. шинээр хашаа, байшин барих, засварлах, орон сууцныхаа нөхцөлийг сайжруулахад зориулж ахмад настанд дэмжлэг үзүүлэх;
3.1.6. эрүүл мэндийн шалтгаанаар удаан хугацаагаар өвчтэй байгаа ахмад настанд эмчилгээний зардалд нь зориулж мөнгөн тусламж үзүүлэх;
3.1.7. ахмад настан өөрөө эсхүл түүний нөхөр (эхнэр) нь нас барсан тохиолдолд мөнгөн тусламж олгох;
3.1.8. ахмадуудын дунд идэвхтэй амралт, аялал, урлаг, спортын арга хэмжээ, уралдаан тэмцээн зохион байгуулахад дэмжлэг үзүүлэх;
3.1.9. амьжиргааны баталгаажих түвшингээс доогуур орлоготой, нийгмийн халамжийн дэмжлэг, туслалцаа зайлшгүй шаардлагатай болон харж хандах ах дүү, төрөл садангүй, ганц бие ахмад настанд мөнгөн тусламж үзүүлэх.
3.2. Аж ахуйн нэгж байгууллагын удирдлага, төсвийн шууд ерөнхийлөн захирагч энэхүү журмын 3.1.2, 3.1.8-д заасан мөнгөн дэмжлэгийн хэмжээг хөдөлмөрийн хөлсний доод хэмжээний 20 хувиас багагүй байхаар тогтоож, байгууллагын төсөв болон дотоод журам, ажилтнуудын нийгмийн хамгааллын хөтөлбөрт тусган хэрэгжүүлэх үүрэг хүлээнэ.
3.3. Сангийн хөрөнгийг зориулалтын бус зүйлд ашиглах, зарцуулахыг хориглоно.
3.4. Сангаас дэмжлэг, тусламж авахыг хүссэн ахмад настан оршин суугаа баг, хорооны Засаг даргын тодорхойлолт болон бусад шаардлагатай холбогдох баримт бичгийг бүрдүүлэн байгууллагын дэргэдэх ахмадын хороо, зөвлөлд хүсэлт гаргана.
3.5. Ахмадын хороо, зөвлөлийн албан ёсны саналыг үндэслэн тухайн байгууллагын удирдлага хүсэлтийг шийдвэрлэнэ.
3.6. Аж ахуйн нэгж, байгууллага өөрчлөн зохион байгуулагдсан, хувьчлагдсан тохиолдолд сангийн хөрөнгийг ахмадуудын бүртгэлийн хамт тухайн байгууллагын эрх, үүргийг шилжүүлэн авсан хуулийн этгээдэд шилжүүлнэ.
3.7. Аж ахуйн нэгж, байгууллага татан буугдсан тохиолдолд сангийн үйл ажиллагааг зогсоож, цаашид харьяалах байгууллагагүй болсон тухай ахмадуудад мэдэгдэн, тэдгээрийн бүртгэлийг харьяа сум, дүүргийн Засаг даргад шилжүүлнэ.
3.8. Харьяалах байгууллага, аж ахуйн нэгж нь татан буугдсан ахмад настанд дэмжлэг үзүүлэх арга хэмжээг нутгийн захиргаа, нийгмийн халамжийн үйлчилгээний болон ахмадын байгууллага хамтран зохион байгуулна.
Дөрөв. Сангийн хөрөнгийн зарцуулалтад тавих хяналт, тайлан
4.1. Сангийн хөрөнгийн бүрдүүлэлт, зарцуулалтад мэргэжлийн хяналт, аудит, санхүүгийн байгууллага холбогдох хууль тогтоомжийн дагуу хяналт тавина.
4.2. Ахмад настанд нэмэгдэл тэтгэвэр, тэтгэмж, тусламж, дэмжлэг олгох, сангийн гүйцэтгэлийг тайлагнах асуудлыг тухайн байгууллагын санхүү болон ахмадын хороо хамтран хариуцан гүйцэтгэнэ.
4.3. Байгууллагын захиргаа нь сангийн орлого, зарлагын жилийн эцсийн гүйцэтгэлийн тайланг дараа оны 2 дугаар сарын 10-ны дотор гаргаж, байгууллагын дэргэдэх ахмадын хороо, зөвлөлд тайлагнана.
4.4. Аймаг, нийслэл, сум, дүүргийн ахмадын байгууллага энэхүү журмын хэрэгжилтэд хөндлөнгийн хяналт тавина.
------о0о------
Засгийн газрын 2017 оны 197 дугаар
тогтоолын 3 дугаар хавсралт
АХМАД НАСТАН, ХӨГЖЛИЙН БЭРХШЭЭЛТЭЙ ХҮН НИЙТИЙН ТЭЭВРИЙН ХЭРЭГСЛЭЭР ҮНЭ ТӨЛБӨРГҮЙ ЗОРЧИХ ЖУРАМ
Нэг.Нийтлэг үндэслэл
1.1. Ахмад настны тухай хуулийн 8.1.5, Хөгжлийн бэрхшээлтэй хүний эрхийн тухай хуулийн 32.8-д заасны дагуу ахмад настан, хөгжлийн бэрхшээлтэй хүн нийслэл, аймгийн төвийн нийтийн тээврийн хэрэгсэл (таксинаас бусад)-ээр орон нутгийн харьяалал харгалзахгүй үнэ төлбөргүй зорчихтой холбогдсон харилцааг энэхүү журмаар зохицуулна.
1.2. Энэхүү журмын үйлчлэлд Ахмад настны тухай хуулийн 3.1, 3.3-т заасан ахмад настан, Хөгжлийн бэрхшээлтэй хүний эрхийн тухай хуулийн 4.1.1-д заасан хүн хамаарна.
Хоёр. Нийтийн тээврийн хэрэгслээр үнэ төлбөргүй зорчих
цахим төлбөрийн карт олгох, сунгах
2.1. Ахмад настан, хөгжлийн бэрхшээлтэй хүнд нийтийн тээврийн хэрэгслээр үнэ төлбөргүй зорчиход зориулсан нийтийн тээврийн цахим төлбөрийн карт (цаашид “цахим карт” гэх)-ыг аймаг, нийслэл, дүүргийн халамжийн үйлчилгээний байгууллага олгоно.
2.2. Нийтийн тээврийн хэрэгслээр үнэ төлбөргүй зорчих цахим карт авахыг хүссэн ахмад настан, хөгжлийн бэрхшээлтэй хүн энэхүү журмын “Тав”-д заасан баримт бичгийг бүрдүүлж харьяа аймаг, нийслэл, дүүргийн нийгмийн халамжийн үйлчилгээний байгууллагад өөрийн биеэр хүсэлт гаргана.
2.3. Аймаг, нийслэл, дүүргийн нийгмийн халамжийн үйлчилгээний байгууллага цахим карт авах хүсэлт гаргасан иргэний хүсэлт, холбогдох баримт бичгийг хүлээн авч олгох эсэх асуудлыг шийдвэрлэнэ.
2.4. Ахмад настанд олгох цахим картын хүчинтэй хугацаа 2 жил байна. Ахмад настан 2 жил тутамд цахим картын хугацааг сунгуулна.
2.5. Хөгжлийн бэрхшээлтэй хүнд олгох цахим картын хүчинтэй хугацааг Эмнэлэг хөдөлмөрийн магадлах комиссоос тогтоосон тухайн хүний хөдөлмөрийн чадвар алдалтын хугацаагаар тооцож олгоно. Эмнэлэг хөдөлмөрийн магадлах комиссоос тухайн хүний хөдөлмөрийн чадвар алдалтын хугацааг сунгасан тохиолдолд цахим картыг мөн хугацаагаар сунгана.
2.6. Эмнэлэг хөдөлмөрийн магадлах комиссоос хөдөлмөрийн чадвар алдалтыг хугацаагүйгээр тогтоосон хөгжлийн бэрхшээлтэй хүнд цахим картыг 2 жилийн хугацаагаар олгоно.
2.7. Хөгжлийн бэрхшээлтэй хүүхдэд цахим картыг Хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын салбар комиссын шийдвэрийн хүчинтэй хугацаагаар тооцож олгоно.
2.8. Байнга оршин суух засаг захиргааны нэг нэгжээс өөр нэгжид 180 хоног болон түүнээс доош хугацаагаар оршин суух ахмад настан, хөгжлийн бэрхшээлтэй хүнд цахим картыг аймаг, нийслэлийн нийгмийн халамжийн үйлчилгээний байгууллага энэхүү журмын 5.1.-5.3-т заасан баримт бичгийг үндэслэн олгоно.
2.9. Байнга оршин суух засаг захиргааны нэг нэгжээс өөр нэгжид 180 хоног болон түүнээс дээш хугацаагаар оршин суух тохиолдолд ахмад настан, хөгжлийн бэрхшээлтэй хүнд цахим картыг аймаг, нийслэл, дүүргийн нийгмийн халамжийн үйлчилгээний байгууллага энэхүү журмын 5.1.-5.3-т заасан баримт бичгийг үндэслэн олгоно.
2.10. Цахим карт авсан ахмад настан, хөгжлийн бэрхшээлтэй хүн нас барсан тохиолдолд түүний өрхийн гишүүн энэ тухай аймаг, нийслэл, дүүргийн нийгмийн халамжийн үйлчилгээний байгууллагад мэдэгдэнэ. Аймаг, нийслэл, дүүргийн нийгмийн халамжийн үйлчилгээний байгууллага иргэний бүртгэлийн асуудал хариуцсан төрийн захиргааны байгууллагын бүртгэл, нийгмийн даатгал болон нийгмийн халамжийн сангаас оршуулгын тэтгэмж олгосон иргэний мэдээлэлд үндэслэн цахим картыг хүчингүй болгоно.
2.11. Ахмад настан, хөгжлийн бэрхшээлтэй хүнд олгосон цахим картыг хаяж үрэгдүүлсэн тохиолдолд олгосон байгууллагад мэдэгдэж, баримт бичгээ дахин бүрдүүлж шинээр цахим карт авна.
Гурав. Цахим карт нийлүүлэх
3.1. Ахмад настан, хөгжлийн бэрхшээлтэй хүнд олгох цахим картыг бэлтгэн нийлүүлэх ажлыг Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу гүйцэтгэнэ.
3.2. Аймаг, нийслэлийн нийгмийн халамжийн үйлчилгээний байгууллага нь ахмад настан, хөгжлийн бэрхшээлтэй хүнд цахим карт олгох ажлыг энэхүү журмын 3.1-д заасны дагуу сонгон шалгаруулсан байгууллагатай гэрээний үндсэн дээр хамтран хэрэгжүүлнэ.
3.3. Цахим карт нийлүүлэх эрх авсан байгууллага дараах үүрэг хүлээнэ:
3.3.1. аймаг, нийслэлийн нийгмийн халамжийн үйлчилгээний байгууллагын захиалгын дагуу цахим картыг идэвхжүүлэн нийлүүлэх;
3.3.2. цахим карт унших, идэвхижүүлэх техник, тоног төхөөрөмжөөр хангах;
3.3.3. гэмтэлтэй цахим карт олгогдсон тохиолдолд үнэ төлбөргүй сольж өгөх.
3.4. Цахим карт бэлтгэн нийлүүлэх эрх авсан байгууллага ахмад настан, хөгжлийн бэрхшээлтэй хүний нийтийн тээврийн хэрэгслээр зорчсон тоо, мэдээллийг аймаг, нийслэлийн тээврийн газарт сар бүр хүргүүлнэ.
Дөрөв. Тээврийн хэрэгслээр зорчих зардлыг тооцох,
нөхөн олговрыг санхүүжүүлэх
4.1. Аймаг, нийслэлийн нийгмийн халамжийн үйлчилгээний байгууллагаас ирүүлсэн ахмад настан, хөгжлийн бэрхшээлтэй хүний тоо, мэдээллийг үндэслэн аймаг, нийслэлийн Засаг даргын Тамгын газар ахмад настан, хөгжлийн бэрхшээлтэй хүнийг нийслэл, аймгийн төвийн нийтийн тээврийн хэрэгсэл (таксинаас бусад)-ээр орон нутгийн харьяалал харгалзахгүйгээр үнэ төлбөргүй зорчуулахад шаардагдах хөрөнгийн тооцоог гарган санхүү, төсвийн асуудал эрхэлсэн төрийн захиргааны төв байгууллагад хүргүүлнэ.
4.2. Санхүү, төсвийн асуудал эрхэлсэн төрийн захиргааны төв байгууллага ахмад настан, хөгжлийн бэрхшээлтэй хүнийг нийтийн тээврийн хэрэгслээр үнэ төлбөргүй зорчуулахад шаардагдах хөрөнгийг аймаг, нийслэлийн төсөвт тусгана.
4.4. Аймаг, нийслэлийн тээврийн газар тухайн сард цахим картаар үнэ төлбөргүй зорчсон ахмад настан, хөгжлийн бэрхшээлтэй хүний зорчсон тоо, гүйцэтгэлийг нийтийн тээврийн үйлчилгээ үзүүлсэн аж ахуйн нэгж, байгууллага тус бүрээр гаргаж, баталгаажуулсан тайланг дараа сарын 5-ны дотор багтаан аймаг, нийслэлийн Засаг даргын Тамгын газарт хүргүүлнэ.
4.5. Аймаг, нийслэлийн Засаг даргын Тамгын газар төсөвт тусгагдсан хөрөнгийг гүйцэтгэлийг нь үндэслэн орон нутгийн нийтийн тээврийн үйлчилгээ үзүүлсэн аж ахуйн нэгж, байгууллагад олгоно.
4.6. Аймгийн Засаг даргын Тамгын газар энэхүү журмын 2.8-д заасан тухайн аймгийн ахмад настан, хөгжлийн бэрхшээлтэй хүн нийслэлийн нийтийн тээврийн хэрэгслээр үнэ төлбөргүй зорчсон нөхөн олговрыг Нийслэлийн тээврийн газрын дансанд улирал бүр шилжүүлнэ.
Тав. Бүрдүүлэх баримт бичиг
5.1. Ахмад настан цахим карт авах хүсэлт гаргахад дараах баримт бичгийг бүрдүүлнэ:
5.1.1. иргэний үнэмлэх, хуулбарын хамт;
5.1.2. цахим картын үнэ төлсөн баримт.
5.2. Хөгжлийн бэрхшээлтэй хүн цахим карт авах хүсэлт гаргахад дараах баримт бичгийг бүрдүүлнэ:
5.2.1. иргэний үнэмлэх, хуулбарын хамт;
5.2.2 Эмнэлэг хөдөлмөрийн магадлах комиссын шийдвэрийн хуулбар;
5.2.3. цахим картын үнэ төлсөн баримт.
5.3. Хөгжлийн бэрхшээлтэй хүүхэд цахим карт авах хүсэлт гаргахад дараах баримт бичгийг бүрдүүлнэ:
5.3.1. төрсний гэрчилгээ, хуулбарын хамт;
5.3.2. Хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын салбар комиссын шийдвэрийн хуулбар;
5.3.3. цахим картын үнэ төлсөн баримт.
5.4. Энэ журмын 2.8-д заасан ахмад настан, хөгжлийн бэрхшээлтэй иргэн, хөгжлийн бэрхшээлтэй хүүхэд цахим карт авахдаа дээрх баримт бичгийг бүрдүүлэхээс гадна түр шилжин суурьшсан бүртгэл хийлгэсэн байна.
Зургаа. Бусад
6.1. Ахмад настан, хөгжлийн бэрхшээлтэй хүнд цахим карт олгох үйл ажиллагаанд аймаг, нийслэл, дүүргийн нийгмийн халамжийн үйлчилгээний байгууллага хяналт тавина.
6.2. Цахим картыг хуурамчаар үйлдсэн, бусдад дамжуулсан, хууль бусаар авсан иргэний цахим картыг хураан авна.
6.3. Хуурамч баримт бичиг бүрдүүлсэн, хуурамч мэдээлэл өгөх зэргээр үйлчилгээнд хамрагдах иргэнийг буруу тогтоосон албан тушаалтанд Нийгмийн халамжийн тухай хуулийн 31 дүгээр зүйлд заасны дагуу хариуцлага хүлээлгэнэ.
6.4. Энэхүү журмын 5.2.2, 5.3.2-т заасан комиссын шийдвэрийг хуурамчаар үйлдсэн бол учирсан хохирлыг буруутай этгээдээр нөхөн төлүүлж Зөрчлийн тухай болон бусад хууль тогтоомжид заасны дагуу хариуцлага хүлээлгэнэ.
6.5. Аймаг, дүүргийн нийгмийн халамжийн үйлчилгээний байгууллага цахим карт авсан ахмад настан, хөгжлийн бэрхшээлтэй хүний талаархи мэдээллийг нийгмийн халамжийн мэдээллийн нэгдсэн санд оруулж мэдээ, тайланг сар, улирал, хагас, бүтэн жилээр гаргаж нийслэлийн нийгмийн халамжийн үйлчилгээний байгууллагад хүргүүлнэ.
6.6. Цахим карт авах иргэний бүрдүүлсэн баримт бичгийг аймаг, нийслэл, дүүргийн халамжийн үйлчилгээний байгууллагын архивт хадгална.
-----oOo-----
Засгийн газрын 2017 оны 197 дугаар
тогтоолын 4 дүгээр хавсралт
АХМАД НАСТНЫ ХӨДӨЛМӨР ЭРХЛЭЛТИЙН БҮРТГЭЛ,
МЭДЭЭЛЛИЙН САНГ УДИРДАХ, АШИГЛАХ ЖУРАМ
