Архангай, Сэлэнгэ, Төв аймгуудын нутгаар өнгөрсөн 7 хоногт 90,0-117,0 мм бороо орлоо

2017 оны 08 сарын 21

Өнгөрсөн 7 хоногт Ховд, Өмнөговийн зүүн өмнөд, Дундговийн зүүн, Дорноговийн хойд хэсгээс  бусад нутгаар 0,0-117,0 мм бороо оров. Орсон тунадасны нийлбэр хэмжээнээс харвал нутгийн төв хэсгээр ялангуяа Булган, Эрдэнэт,Дархан, Сэлэнгэ, Төв,Архангайн нутаг, Өвөрхангайн хойд хэсгээр 41,1-117,0 мм, Завхан,Говь-Алтайн нутаг, Архангай, Өвөрхангайн өмнөд, Баянхонгор, Дундговийн хойд, Хэнтийн баруун  хэсэг, Дорнодын зарим газраар 20,1-39,9 мм, бусад нутгаар 0,0-19,4 мм тунадас орсон байна. Үүнээс хамгийн их нь Архангайн Батцэнгэл, Булганы Бугат, Дашинчилэн, Баяннуур, Сэлэнгийн Бугант, Төв аймгийн Нөхөрлөл, Зуунмодод 90,0-117,0 мм бороо орлоо.

 

Агаарын температурын хувьд хугацааны дунд үеэр нутгийн өмнөд хэсгээр нэлээд халж, Алтайн өвөр говь болон Өмнөговь, Дорноговийн нутгаар 34-38 градус хүрч халав. Харин хугацааны сүүлчээр бороо орсоны улмаас ихэнх нутгаар сэрүүссэн байна. 

 

 7 хоногийн дунд үеэс хойш ихэнх нутгаар шөнөөд нэлээд сэрүүсч Алтай, Хангайн уулархаг нутгаар 0 - 3 градус хүрч цочир хүйтэрсэнээс хамгийн сэрүүн нь Баян-Өлгийн Даян, Ялалт, Цэнгэл, Ховдын Дуут, Баянхонгорын Гурвунбулаг сумдын нутгаар -3 градус хүрч цочир хүйтэрсэн байна.